Anrhydeddu Thelma a Barry Webb.
Bu cyfarfod Cymdeithas Ffynhonnau Cymru yn yr
Eisteddfod Genedlaethol yng Nghaerdydd eleni’n achlysur anrhydeddu Barry a
Thelma Webb gennym. Mae’r Webbiaid (o Lanhiledd ger Abertyleri ym Mlaenau
Gwent) wedi treulio rhagor na 50 mlynedd yn ymchwilio i ffynhonnau Cymru.
Maent
wedi ymweld â phob rhan o Gymru, gan wneud cofnodion manwl o enwau, lleoliadau,
hanesion a thraddodiadau, gan ddefnyddio ffynonellau llafar, ysgrifenedig a
phrintiedig. Ar yr un perwyl bu iddynt fentro i rannau eraill o’r ynysoedd hyn
hefyd, gan gynnwys Iwerddon, lle bu ond y dim i Barry suddo i fignen. “Roeddwn
i’n meddwl”, meddai, “mai fi fyddai’r ‘corff cors’ nesaf!”
Ffrwyth
eu hymroddiad yw 20 ffeil drwchus o wybodaeth a thua thair mil o gardiau
mynegai. Cyflwynwyd yr archif werthfawr hon i Amgueddfa Werin Cymru (Sain
Ffagan) yn 2016: roedd yn ddigon i lenwi cist cerbyd.
Anrhydeddwyd y Webbiaid gennym oherwydd iddynt
greu, diogelu a rhannu’r fath drysor: ac yn arwydd o’n parch a’n
gwerthfawrogiad, comisiynodd Robin Gwyndaf y ceinlythrennwr Tegwyn Jones o Bow
Street, i lunio teyrnged hardd, wedi’i fframio gan Anthony Burrell, Oriel y
Bont, Aberystwyth. Cyflwynwyd hon iddynt gan ein Cadeirydd, Eirlys
Gruffydd-Evans. Diolch yn fawr i bawb fu â rhan yn yr achlysur hyfryd hwn, ac
yn fwyaf oll, i’r Webbiaid am eu gwaith dyfal. Hir oes iddynt!
cffccffccffccffccffccffccffccffccffccffccffccffccffccffccffccffccffccffccffc